人有三急，附近有洗手間自然會衝入去。然而，深井有酒樓張貼告示，非食客要收20港元，才可使用洗手間，不少人直斥無同理心，究竟酒樓欠同理心抑或另有苦衷？
「我哋個廁所直情衰過公廁呀！」酒樓負責人謝先生大吐苦水。原來因為酒樓鄰近巴士站，不時有途人前來借廁所，假期日子，更出現逾百名非食客車輪轉使用洗手間，影響洗手間衞生環境才迫不得已貼出告示。
位於深井的嘉韻酒樓，約三星期前於門口張貼告示，表示「廁所不外借，非客人每次$20」，告示隨即被網民上載於社交網站，引起熱烈討論。謝訴苦，張貼告示，收取20港元如廁費用，並不是企圖「賺番筆」，而是忍無可忍：「逾百個街外人入嚟用（廁所），多數都係上落巴士�H乘客，亦都有行山人士及旅客。」他續指，「更加有唔少人試過，帶埋（條）水喉入嚟沖涼。」
所以，惟有張貼此告示，希望改善酒樓洗手間的衞生情況，不過從未試過收取費用：「有啲人就話『我就係要用呀，我唔畀錢呀，睬你都傻』，咁我哋都冇辦法。」
謝表示，明白人有三急，所以現時會免費提供後門的廁所予公眾使用，希望大眾能夠體諒。張貼告示後，大部分人都願意到後門的洗手間，到酒樓「借廁」的人由高峰期逾百個減至10多個，情況大大改善。謝說：「冇酒樓入面嗰個咁靚，但一樣好乾淨，有晒廁紙，專人打理，咁都好公道呀。」
東網記者在現場視察，發現距離巴士站約3分鐘路程，已有公廁，內裏設備齊全，不過大多數人卻為貪方便而直闖酒樓，解決「燃眉之急」。至於市民如廁收費又點睇？羅小姐指，「都公道，始終人哋做生意，唔好阻住人」。
http://hk.on.cc/hk/bkn/cnt/news/20171023/bkn-20171023060051741-1023_00822_001.html?refer=hn2
