聾森

中國地方債務激增中環淡友一向好鍾意睇中國啲地方債務點點點、美債點點點衰，地方經濟「就嚟爆煲喇」云云，話說內地又有新數據喇，地方債務情況的確惡化緊，大淡友今次又有話題。
據《新華社》報導，截至上年年底，中國地方政府債務總規模達到二十四萬億人仔，其中逾十五萬億，係地方政府有償還責任嘅債務，比起二零一三年激增四成一，似乎債務問題，唔可以任由佢惡化落去，所以近日中國全國人大，先剛剛開始咗限額管理，預計今年各個地方政府債務限額為十六萬億元。
內地有證券研究人士分析，數字增加，可能同政府替別人承擔嘅債務增加，而且一三年根本好多都未入數，所以先至有咁嘅效果。
但無論如何，牽一髮動全身，如果中國真係收緊對地方債嘅管束，對整體融資環境都唔好過。