人民幣喺「阿爺」口術（其實唔少人都開咗口，連新興市場之父MarkMobius，都講人仔唔會再大幅貶值）兼實質操作之下急彈，但另邊廂，中山卻爆出又有小市民聲稱，喺銀行ATM，拎到假人仔…
話說當事人，去飲茶嘅時候，先發現手上張五百蚊人民幣係假幣，佢話十日前喺銀行提取三千五百元，自己「一直好相信銀行」，點知出事。
內地有記者睇過剩餘嘅假幣，編號全部一樣、無金屬線等等，不過事後銀行方聲稱無可能有假，仲質疑會唔會係客戶自己保管出現問題，事件再次變成「羅生門」。
其實，就算呢次係客戶自己閃失，回內地做生意或消費、旅遊，盡量唔好回內地兌換人仔，怕假鈔，已經係唔少人嘅習慣，而假鈔問題亦的確一直存在，根據之前據新華網報道，上年年底廣東警方喺粵東總共搗破繳獲假鈔兩億二千萬元「人仔」。
據了解，犯罪集團先以每日一萬蚊高薪，請「印刷工人」來做，喺廣東做一半，運到湖南加工，然後以每張六元極低價出售，密食當三番。
其實香港一樣有假鈔「流通」，買賣人仔嘅要小心提防，根據警方數字，近年在港檢獲人仔偽鈔量約4000至5000張，相對穩定甚至微跌，今年上半年檢獲一千八百多張，八成係一百蚊紙。
人民幣新匯改也好，後市會回升都好，最緊要係，人民沒有假鈔，手上嘅投資才是真的。（希望早前出土豪金新幣，可以減輕假鈔問題）
