地政總署早前把位於般咸道的兩棵細葉榕斬除，反對派立法會議員許智峯、區諾軒、陳淑莊等齊齊反對。不過，昨日午夜零時許，香港大學校園內一棵細葉榕疑因難抵熱帶氣旋「艾雲尼」帶來的風雨而突然倒塌，壓中更劏開樹下一輛校巴的車頂。
不少網民都叫當日「護樹」的許智峯、陳淑莊唔好龜縮，出嚟講兩句，有人就揶揄佢哋已經轉咗去立法會審議「一地兩檢」時拉布，邊個得閒向市民交代，等啲人慢慢唔記得，就讓一切隨風咁話。
兩棵位於港島半山般咸道馬路旁的老樹因病入膏肓、不斷傾斜，隨時塌下傷人，政府委派工人到場打算砍樹，但遭許智峯、區諾軒和陳淑莊等阻撓，聲稱砍樹等同「毀滅香港人歷史」，最後有街坊到場狠批他們為攞政治本錢而罔顧人命而敗走。不過，他們仍然死心不息，更向申訴專員公署投訴地政總署斬樹涉行政失當。
言猶在耳，港大賽馬會第二舍堂村停車場一棵細葉榕就疑因難抵風雨而倒塌，幸無人受傷。雖然現場並非幾名反對派「護樹」之地，但亦證明咗政府唔係無端端搵嘢嚟做，走去斬樹。
蔣麗芸fb轉載：保育要顧安全
民建聯立法會議員蔣麗芸就喺fb轉載咗呢單新聞，仲發文話：「保育石牆樹固然重要，但亦要顧及市民的安全，若不幸發生因塌樹而造成的人命傷亡，屆時就後悔莫及了！」
唔少網民就鬧爆「護樹三丑」點解唔出嚟講兩句。「Mill Chan」質問道：「今次真係好彩冇人傷亡！呢班垃圾係又反唔係又反，好彩上次有班街坊趕佢哋走又好彩政府企硬，如果唔係問你班垃圾點負責！」「Michael Fung」也道：「多日來冧樹，正好反影（映）陳淑莊反對斬樹的最好證明，證明她係錯到離地？」
「Roy Ma」揶揄：「我覺得要立即開記招請陳議員出席，問陳議員對呢件事有乜睇法，佢一定知錯係（喺）邊度有乜官員要負責，因為全港只得高貴法律界陳議員對（係）樹木方面唯一專家，大家又可以學吓嘢！」
「Fong Kwun Shing」就提醒：「大家唔好漏左（咗）搶劫案疑犯許智峰（峯）呀∼∼佢當日都好勇，事後亦有係（喺）fb抽足水∼∼∼」
網民諷3人只「掛住拉布」
「李勝華」氣憤道：「泛民為反而反，冇膽量又冇擔當能力，出來講講野（嘢）啦！」「Ching Yue Kan」就代答：「而（𠵱）家人地（哋）係（喺）立法會內拉緊布呀（吖）嗎...‥民生的事佢唔理得咁多啦...‥」
「Ming Lo」一語道盡反對派逢政府必反的心態：「放心幻覺哩（嚟）姐（啫），港大唔會有事，有事都係政府事。」
新聞來源連結:
http://paper.wenweipo.com/2018/06/07/HK1806070014.htm
