超級骨友
老任有項不成文規矩，逢新機推出，總比官方公佈日期提早一兩天到貨！本來今日先見街嘅 3DS，記者已提前試玩兼感受一番！新返遊戲中，最期待嘅《 Street Fighter IV 3D Edition》亦同步推出；但要留意，呢批水機暫只供應黑、藍兩色，售價比定價 25,000日圓炒高近$1,000；當然，遊戲機呢類潮物，早買早享受，值得嘅！
放大圖片
顏色：黑、藍、金、紫 i-Gamer（ 2725 3338）
由本來兩千幾蚊港紙炒上$3,380，係咪太過火？ 4GB版 XB360連 Kinect套餐，都賣緊$2,500啫，好似唔多化算喎！當然，玩得 3DS你唔係老任就係手提機粉絲，況且暫時得日版，想玩肯定要焗買。但 Sales亦好坦白，如果等得嘅，一個月後會返美版，到時唔使改機，一樣玩到日版遊戲，最緊要價錢起碼平$1,000！ 3D Games感受係點？就好似睇 3D電影，接唔接受、因人而異。值得一提，喺屏幕邊有粒 3D按鈕，視乎個人口味，你可自行調校畫面立體程度，若然玩得耐見暈，咪熄咗佢囉！
■呢粒 3D鍵好似音量掣咁，可調校效果大細。
■打《 Nintendogs+ Cats》要用 Stylus玩。
■ 3DS遊戲售價平均上四百幾，玩新嘢就要捱貴價！
■跟機附擴真實景卡，用雙鏡頭睇會變 3D公仔！
除咗勁玩 3D遊戲，另一項特別功能就係機身配備咗三個鏡頭。雖然機內眼仔只得 30萬像素，但機面雙鏡頭，可勁拍 3D相；拍完照，仲可進入主機目錄嘅相簿位置，慢慢欣賞，甚至乎加入文字或改變相片顏色，自由度極高。 如果想搞鬼啲，入面仲有隻 Mini Game，你要先自拍或影其他人嘅大頭照，程式會將佢 Key落一隻 Character身上，再配合移動 3DS嘅位置，將怪物統統擊落，勁過癮！
■ 3D相片僅 30萬像素，咪諗住影相時仲有對焦框。
■目錄內有幾款笑爆 Mini Game，須配合鏡頭進行。
《 Street Fighter IV 3D Edition》$428 ■試過多款遊戲，街霸立體效果最掂！畫面雖左右移動進行，但主體激凸，好似浮出畫面咁逼真。
查看詳細資料
TOP
