剛過去的2015年，雖然沒有重大動盪事件發生，但很多民生、政治議題都困擾著港人，以至近期銅鑼灣書店股東及店員相繼失蹤事件，書店東主李波更懷疑在香港被擄回大陸調查，人心惶惶，大家都驚覺香港變得不再香港。
一齣講述10年後香港的電影《十年》，預言黑幫政治、紅衛兵文化、取締廣東話等相繼出現，電影引起社會廣泛討論，無獨有偶，蘇師傅替香港把脈時，亦經常提起香港的「最後十年」。
他所說的是堪輿學上，香港由2014年開始，只剩下10年地運。10年後，即2024年，香港的運氣將會停下來，面臨發展停滯的階段，情況就像歐美和日本一樣。而由於香港與中國行同一地運，所以中國也將面臨相同狀況。
「每個城市總有起有跌，10年後我都唔知會發生咩事，要到時先計，所以大家叻就搵埋呢10年錢，勤力一些。」他強調香港增長減慢，不代表會完全衰落，基本的謀生能力仍有，但像過去的高速發展就未必會再出現。
「宏觀一點諗，香港有咩出路先？旅遊又唔掂，仍然靠金融、專業服務，經濟點再起飛？誠信對香港好重要，但依家連香港人都呃香港人，好似你去電訊公司續約，十間有九間呃你，無買的產品又硬塞給你，優惠過期又唔通知就每月繼續收你錢，以前香港做生意邊係咁。」蘇師傅對於近年科網創業潮亦大潑冷水，認為香港沒有工廠、市場又細，期望寫App發達的人根本在發夢，「成日話北上發展，連我本書都入唔到大陸，你點入呢？你唔鍾意大陸人，佢哋一樣唔會啋你。」
2013年習近平上台後，蘇民峰的運程書便因鼓吹迷信，而禁止於內地出版，他亦接受不了內地文化，已十年沒有回內地睇風水，「我已百分之百同李嘉誠一樣，唔返大陸10年，唔做佢哋生意，除非香港有一日變成大陸一樣，咁我就無辦法了。」
他覺得近幾年香港變化最大是政治環境變得很差，「我最敢大聲鬧�H係董建華，連曾蔭權都唔好鬧啦，現在呢個更加千祈唔好講，我已經唔出聲啦，任何政治嘢千祈唔好訪問我。」明年特首選舉他亦沒有心水，因為香港由2016年至2021年將踏入經濟活躍期，基本上任何人上台都無問題，「經濟好就邊個做都好，邊個當選就關佢好唔好運事囉！」
