鮑你識煮
做法：
1.乾鮑置於凍水浸十五小時。
2.記得剪掉鮑魚嘴，這部分藏穢物，不能吃下肚。
3.取起，另放熱水中，以中細火煲兩小時，熄火，焗兩小時；最後放入豬手、腩排或老雞等煲四至六小時。
小貼士：如是日本乾鮑，需浸發二十四小時。先煲後焗的程序可令鮑魚鬆軟肉嫩，不會鞋烚烚。
乾鮑大晒冷
經過曬乾處理，味道最濃、值錢最貴，可長時間保存，口感煙韌彈牙。但它較硬身，需要花時間炆煮。乾鮑又分網鮑、吉品鮑、禾麻鮑等不同品種，產區以日本水準最高，其次是中東、南非、印尼及菲律賓等。
南非網鮑
體積最大，腰圓肉厚，珠邊細小，橫切可見網狀花紋，口感略帶煙韌卻不失柔滑。
吉品鮑
產自日本岩手縣，肉質彈牙又有嚼勁，形似元寶，色澤金黃，是鮑魚界的『靚仔』。
禾麻鮑
來自日本青森縣，特點是滑溜、易消化，連老人家亦可食用。
南非鮑
滑溜而鮑魚味重，質素拍得住日本鮑八成水準，但價錢便宜一大截。
咪揀中死鮑
買鮑魚最忌買到死鮑，即用已離殼或營養不良鮑魚製成，色灰黑、背部凹陷，不宜食用，點平都唔好買。
