B女多手淥親 港媽竟指茶記「卸責」
做家長要一眼關七，尤其是出街。
過馬路、搭電梯，統統可以危機四伏，仲有出街食飯！
有位港媽就喺土瓜灣街坊facebook群組出post，
投訴區內一間茶餐廳。
事源係呢位港媽一行三人帶埋BB女去茶記開餐，
當店員將碗熱辣辣�H麵放喺枱，BB女一時多手拍落個碗度，
成碗麵倒瀉，淥親手腳同肚仔。
港媽就話當時店員冇人有反應，要問先識得拎冰水俾B女降溫。
到佢地call咗白車準備上車去醫院，
茶記老闆問同行親友收錢，佢地覺得非常不滿，
仲話老闆卸責。
不過有目擊者留言話，當時店員都有幫手，老闆亦有上前了解。
而當事人就補充，事發時係想抱BB上BB車，
將個B交俾老公嗰陣就出事。
究竟邊個唔啱邊個唔著？怕且要睇晒上文下理先好判斷。
提提你，阿港媽已經刪咗個post嘞。
咁啱睇到另一個茶餐廳老闆受訪時講到，
有次個客人同小朋友去食鐵板餐，
上菜時侍應已經同客人講「小心塊鐵板好熱」。
點知小朋友都係辣親手，位家長就好嬲，講晒粗口鬧人唔提佢。
老闆反而認錯，仲送糖水俾呢位食客。
唔知呢件事係咪發生喺「出個post寫衰你」、「有錯都係你地錯」�H年代？
