是咁的，我雖然平時無咩特別技能，又無咩個人專長，但都叫做野認真同返工準時。我早前就申請左Ad___o既一份工，係東華嘉年華做EVENT HELPER，我已經返左一日工簽晒約，但未比銀行資料同身份證副本，當初我有問佢：真係唔需要？佢個邊一個好似好勁既ＨＲ就話：你驚我走你數？驚咪唔好做囉！咁我平時就毒毒地，又幾怕事同埋都唔係串個Ｄ人，所以就低頭簽約，話晒岩岩畢業想試下返工。
講返正題，我返左一日工（３月１３號），返左超過１０個鐘時間，人工就每小時５０蚊，做既野其實幾簡單，但我全程同Ｄ客都有講有笑，有個仲話我幾幽默，好多時候Ｄ小朋友發牌氣，我都有氹返佢，仲私人比糖佢地食，同唔同既ＰＡＲＴ ＴＩＭＥ同事都好岩傾，我地都覺得呢份工可以帶到歡樂比人，又可以快樂地上班。之後收工後，有個上級問我聽日仲可唔可以返黎幫手，我二話不說答應，佢仲提我可以坐員工車返黎，會方便Ｄ。到半夜仲收到ＣＯＭＦＩＲＭ電話，提我唔好遲到，同埋唔好唔返，因為落左人數。咁我做野不嬲有交帶，雖然我住天水圍最入最入最入個Ｄ位，而個嘉年華係九龍灣啟德碼頭，我要轉幾程車來回３個半鐘頭，但唔緊要，份工真係帶到我有滿足感。
所以今日（３月１４號），我仲提早了半個小時出門口，不但坐到員工車去，仲要係早個批到達。去到之後就等集合，陸續有唔同員工返到，有好多琴日都未見過，閒聊間都話朋友介紹，今日黎試下玩，我仲同佢地講其實好開心，時間好易過。跟住到正式埋位，去報到處報到，我就去左ＧＡＭＥＳ 既地方報到（因為佢話有做過既就去返個到報到），之後ＧＡＭＥＳ個經理就叫我去機動遊戲個邊報到，佢話個邊唔夠人，咁我份人都好易話為，就去左機動遊戲個邊報到，但機動遊戲個邊個經理望一望我，就呼喝我叫我行埋一邊，之後有幾個人同我一齊企埋一邊，前後有４個人同我一齊企。
跟住有個著住唔同衣著，自稱係呢到話事既人同我地講：你地走啦，夠人，唔洗要你地。
我地異口同聲話：下？！明明琴日仲話要人，我地…
佢：僱主唔要人唔Ｘ洗你教呀話？走啦Ｘ街。
我：咁唔公平，我地明明早到，仲做得好地地…
佢：入面既人全部都有經驗，你地先返得幾日
我：下？！明明入面好多都第一日返！
佢：琴日有人投訴你，話你表現差，我依加炒Ｘ你，得未？
之後我地就比佢趕出去集合處，跟住有個女仔眼濕濕，因為佢第一日返工就比人咁對待，我比左張紙巾佢，之後我都想爭取返應有既公義，於是就報左警，報案號碼：１６００５４０４，警察到埸後，果個經理立即上前同警察握手，話我地霸佔私人地方同屈我地恐嚇佢，叫警察趕我地走。
警察都好好人，佢見到個女仔眼濕濕都無聽個經理廢ＵＰ，問個女仔咩事，之後我地由頭到尾講一次，佢就話唔涉及刑事成分，最多幫我紀錄經過，有需要交比勞工處。警察都叫我地走同埋唔好同佢地嘈，因為唔值得。
跟住警察離埸，我地都即將走，個經理指住我地放係地下既袋話：拎返你Ｄ垃圾走啦，契弟，ＸＸＸＸ。
我：咁你幾時出返琴日既糧比我。
佢：出埋帛金比你呀，小心Ｄ呀，ＸＸＸＸ。
當然啦，糧就未收到，之後我就慢慢咁返左天水圍，而個女仔都自己走左，不平則嗚，不嗚則平；嗚呼哀哉，我假裝四處看風景，看看空空的紙巾袋，又眺望著A___co的員工車馳走，下一個受害人，會是你麼？
最右手邊就係講粗口既經理
我地就係呢個集合處到 被人羞辱左近半個鐘
