呢兩日，各大討論區都講緊「恒馳汽車」。
本港除了《蘋果日報》外，全港報章都有頭版的「恒馳」廣告。號稱由頂級丹麥設計師設計線條而「全球最靚」的6款新電動車，到底「恒馳」得唔得呢？中國咁快就趕上Tesla了？成為好多人心中疑問。
有港人話「根本未有架車」，宣傳只求「集資上市」；內地網民則認為係「恒大PS車」，片同相就靚，但一日未見實車，都難以下定論，有人就話，會唔會又係「參考外國」之作？
其實，「恒馳」說穿了就是「中學為體，西學為用」的其中一個例子罷，佛山泰特機電（恒大收購了70%股權）為體，瑞典新能源汽車NEVS的造車技術為用（恒大收購了51%股權）。不是中國技術強大，而是中國企業有錢，所以信唔信「恒馳」，就等於你信唔信買下「小紅點」後的聯想notebook—--唔會太差，但未必係同一杯茶。
NEVS源自紳寶汽車Saab，過去幾十年經營不善，輾轉落在不同的經營者手中。2000年前後係通用�H全資子公司，但經營一直不好，2008年次按危機令通用要為紳寶尋找「白武士」，甚至不排除將品牌摺埋；後來北汽買下紳寶部份整車技術和系統，2010年荷蘭的超跑製造商Spyker買下「賣剩蓆」紳寶，但點知Spyker都係頂唔住，公司出唔到糧，Spyker改組成為SWAN。
總之，多年來紳寶就係一筆糊塗賬，2012年卒由中國香港國能生物發電集團旗下公司、日本風投陽光投資持股的NEVS買下（但旗下零部件子公司則由瑞典政府掌管），取得紳寶汽車的經營權。後來日本方退出，去年初恒大再從國能手中買下51%股權，瑞籍華人CEO蔣大龍離任，恒大才正式入主。
所以「恒馳好唔好」，相當於要問「以航太工業、戰鬥機與民航機起家的紳寶好唔好」、「已過時的瑞典車品牌好唔好」、「經包裝的弱勢車廠好唔好」，對紳寶仍有感情的可以問「前驅之王好唔好」等等。紳寶未拆骨前以安全耐用著稱，係一代好車，但如今電動車方面可唔可以超英趕美呢？學跑馬睇血統，似乎就難啲了。
至於點解要用「恒馳」而唔用「恒寶」呢？或者「恒大在奔馳」先顯得中國品牌強大吧，同「奔馳」比起來，話唔定會有額外的品牌效應呢？
