【on.cc東網專訊】作為職業司機，每日在馬路上遇到的事層出不窮，如何應付，就是對司機最大考驗。昨日(21日)網上流傳一段短片，一名夜更的士司機在一個晚上，竟在不出數分鐘內，先後遇上驚險撞車，再見怪男馬路中央跑步，最終他又如何反應？
上載片段的網民是該名的哥，據其車Cam拍攝片段，當時夜深時段，的士沿紅磡海底隧道往香港出口，駛出隧道約100米，一輛白色法拉利跑車從後飆出，沿告士打道向中環方向駛去，期間前車兩輛的士因事故收慢，跑車疑收掣不及，扭軚向左閃避，但最終仍是撞到前車的士車尾，兩車司機即時落車檢視傷車身「傷勢」，期間可見的士死氣喉被撞至「吊吊揈」。
該的哥由於與前車保持一定距離，故此未有撞及，但的哥目睹後，亦激動得大聲爆粗：「踩啦，踩啦，隧道已經咬咗我...」的哥發洩一輪後，便在兩車車罅中駛走。
不過當的哥再駛前約300米，再發現一名男子沿着路中心奔跑，的哥及時閃避，但大惑不解說：「有個人喺度？」的哥事後更在網上留言幽自己一默：「千算萬算都算唔到有條xx喺告士打道奔跑，我哋紅跑司機，今次不避貓不避狗，確實係避人...無言。」
